Tveir turnar standa eftir kreppuna

Eftir eina verstu fjármálakreppu sem skekið hefur heiminn frá því í kreppunni miklu á fjórða áratug síðustu aldar er allt útlit fyrir að tveir turnar standi eftir í bandarísku bankakerfi. Umræddir bankar eru JPMorgan Chase og Goldman Sachs.

Í dagblaðinu New York Times er fjallað um málið og minnt á að Goldman Sachs skilaði umtalsverðum hagnaði á öðrum ársfjórðungi. Þá nam hagnaður JPMorgan 2,7 milljörðum dala sem jafngildir um 343 milljörðum íslenskra króna.

„Það versta er afstaðið í fjármálakreppunni. Það verður ennþá bókfært tap víða og það er langt í að lánamarkaðir virki eðlilega, þannig að enn gæti ýmislegt breyst. En JPMorgan Chase og Goldman Sachs standa núna uppi sem sigurvegarar," segir í New York Times, en þó er bent á að Citigroup og Bank of America gætu átt mjög farsæla framtíð.