Sneijder: Verðum að gleyma Mourinho

Stjarna Inter, Wesley Sneijder, segir að það sé kominn tími á að leikmenn félagsins gleymi José Mourinho og einbeiti sér að því að skila góðu starfi fyrir Rafa Benitez.

Það er risaleikur á sunnudag þegar Mílanóliðin AC og Inter mætast.

"Mourinho er hluti af fortíðinni. Við verðum að hugsa um nútímann og getum ekki velt okkur lengur upp úr fortíðinni. Benitez er frábær stjóri rétt eins og Mourinho," sagði Sneijder á Twitter-síðu sinni.

"Við munum komast yfir þreytuna og ég verð upp á mitt besta fljótlega. Hvíldin hefur hjálpað mér mikið. Ég vil alls ekki tapa leiknum um helgina. Minn fyrsti leikur með Inter var gegn AC og ég mun aldrei gleyma þeim leik."