Einar Andri: Líklega okkar besti varnarleikur í vetur

Einar Andri Einarsson, annar af þjálfurum FH, býst við jafnari leik þegar liðið mætir Fram öðru sinni á laugardag í undanúrslitunum um Íslandsmeistaratitilinn í handbolta.

FH-ingar unnu 29-22 í Kaplakrika í kvöld í fyrsta leik liðanna.

„Við spiluðum líklega okkar besta varnarleik í vetur. Sóknin var einnig mjög öguð hjá okkur svo ég myndi segja að við höfum spilað mjög vel. Við náðum mjög snemma ákveðinni forystu og náðum að halda þeim í fimm til sex marka forskoti allan tímann. Þetta var mjög stöðugt og allir sem komu inn skiluðu sín," sagði Einar eftir leikinn.

Liðin mætast að nýju á laugardag og með sigri þar kemst FH í úrslitin.

„Þeir eru nú komnir með bakið upp við vegginn og við verðum að fara vel yfir þennan leik og sjá hvað við getum lagað. Það verður örugglega jafnari leikur."