Baldvin: Næsta sem ég geri er að klára ginflöskuna

Baldvin Þorsteinsson, leikmaður FH, var kampakátur eftir að liðið hampaði Íslandsmeistaratitlinum í handbolta.

„Við höfðum meiri handboltagetu og fleiri kalla. Þeir eru með bestu sjö en við höfum bestu fjórtán," sagði Baldvin þegar hann var spurður að því hvað FH hafði fram yfir Akureyri.

Hafnarfjarðarliðið vann einvígið 3-1 og fékk bikarinn fyrir framan metfjölda áhorfenda í Kaplakrikanum í kvöld.

„Ég er búinn að eiga Bombay ginflösku upp í skáp hjá mér frá áramótum og hef ekki snert hana, það næsta sem ég geri er að klára hana."