Grátandi leikmaður Packers dæmdur í sex ára fangelsi

Johnny Jolly, leikmaður Green Bay Packers í NFL-deildinni, var í dag dæmdur í sex ára fangelsi þar sem honum tókst ekki að halda skilorð.

Jolly hefur viðurkennt að vera háður lyfseðilsskyldum verkjalyfjum sem hann hefur misnotað lengi og orðið sér úti um lyfið á ólöglegan hátt.

Bæði Jolly og móðir hans grétu í réttarsalnum í dag og grátbáðu dómarann, í orðsins fyllstu merkingu, að senda leikmanninn í meðferð í staðinn fyrir fangelsi.

Dómaranum var ekki haggað og Jolly er því á leið í steininn og NFL-ferli hans þar með væntanlega lokið.