Batmanbíllinn til sölu á eBay

Batmanbíllinn sem notaður var í myndinni Batman Returns árið 1992 er nú til sölu á eBay. Með honum fylgir upprunalegur samningur Warner Brothers og DC Comics um notkun bílsins í myndinni.

Í Batman Returns lék Michael Keaton ofurhetjuna og margir muna eflaust eftir Michelle Pfeiffer í hlutverki Kattarkonunnar og Danny De Vito í hlutverki Mörgæsarinnar í þessari mynd en Tim Burton var leikstjóri myndarinnar.

Bíllinn er með sérsmíðaða yfirbyggingu og getur dregið inn hjólin. Undir vélarhlífinni er átta strokka, 200 hestafla, Chevrolet sleggja. Á eBay segir að bílinn sé í toppstandi. Þar að auki er bent á að þetta sé aðeins í annað sinn í sögunni sem Batman bíll fer í sölu.

Lágmarkstilboð í Batmanbílinn er 499.000 dollarar eða tæplega 59 milljónir kr. Hæsta boð hingað til nemur 302.000 dollurum.