Ásmundur Tryggvason ráðinn til Íslandsbanka

Ásmundur Tryggvason hefur hafið störf hjá Íslandsbanka sem forstöðumaður fyrirtækjaráðgjafar, að því er segir í tilkynningu frá Íslandsbanka.

Hann hefur víðtæka starfsreynslu af fjármálamarkaði og starfaði hjá Exista hf. sem forstöðumaður frá árinu 2005-2011.

Í tilkynningu Íslandsbanka, vegna ráðningar Ásmundar segir að hann sé Íslandsbanka vel kunnugur en hann hefur starfaði sem þjónustufulltrúi í bankanum, sem sérfræðingur í Greiningu frá árinu 2000-2003 og sérfræðingur í fyrirtækjaráðgjöf frá 2003-2005.

Að auki hefur Ásmundur setið í stjórnum fjármála-, tækni-, iðn-, síma- og útgáfufyrirtækja. Hann er lögfræðingur að mennt og starfaði síðast sem lögmaður hjá Lögmönnum Bankastræti slf. þar sem hann var jafnframt meðeigandi.

Haft er eftir Tryggva Birni Davíðssyni, framkvæmdastjóra Markaða hjá Íslandsbanka, í tilkyninngu frá bankanum að ráðning Ásmundar sé mikið ánægjuefni.

„Ráðning Ásmundar í stöðu forstöðumanns fyrirtækjaráðgjafar Íslandsbanka er mikið ánægjuefni. Með honum koma sterk tengsl við atvinnulífið og umfangsmikil viðskiptareynsla. Ráðningin undirstrikar þá stefnu bankans að vera leiðandi í fjárfestingabankastarfsemi og móta þannig íslenskt viðskiptaumhverfi."