Keflavíkurflugvöllur sá næst besti í heiminum

Keflavíkurflugvöllur er í öðru sæti yfir bestu flugvelli heimsins samkvæmt árlegum lista sem ferðavefurinn Frommer gefur út.

Í efsta sætinu er Hajj flugvöllurinn í Jeddah í Saudi Arabíu. Hann hefur þá sérstöðu að vera aðeins opinn í sex vikur á ári hverju, það er meðan á pílagrímaferðum múslima til Mekka stendur.

Flugvellirnir eru dæmdir eftir þáttum eins og hreinlæti, þjónustu, hvort brottfarir og komur séu á tíma eða ekki og hversu auðvelt að er ferðast frá þeim til þeirra borga sem næstar eru.

Í umsögninni um Keflavíkurflugvöll segir m.a. að farþegar séu ánægðir með heimilislegt yfirbragð vallarins og stórkostlegt útsýni úr stórum gluggum flugstöðvarinnar þar sem sjá má hina dramatísku náttúru Íslands.

Í næstu sætum á eftir Keflavíkurflugvelli eru Incheon flugvöllurinn í Seoul í Kóreu og Rock flugvöllurinn í Wellington á Nýja Sjálandi. Verstu flugvellir í heimi eru hinsvegar John F. Kennedy flugvöllurinn í New York og flugvöllurinn við Manila á Filippseyjum.