Segir málshöfðun ekki standast skoðun

Kjartan Gunnarsson, fyrrverandi varaformaður bankaráðs Landsbankans, segir að hann og lögmenn sínir telji að málshöfðun slitastjórnar Landsbankans gegn sér standist ekki skoðun. Málshöfðunin byggi á því að sér hafi, sem bankaráðsmanni Landsbanka Íslands, verið ljóst eða mátt vera ljóst að bankinn væri ógjaldfær í upphafi dagsins 6. október 2008 og honum hafi borið að gera ráðstafanir til að tryggja að ekki færu greiðslur út úr bankanum þennan dag.

Kjartan segir að Landsbankinn hafi verið gjaldfær í upphafi umrædds dags. Bankinn hafi átt nægt fé í íslenskum krónum og beiðni um gjaldeyrisaðstoð hafi verið til afgreiðslu hjá Seðlabanka Íslands. Forsendur til að loka bankanum í upphafi hafi því alls ekki verið fyrir hendi og slík aðgerð hefði skaðað bæði bankann sjálfan gríðarlega og sett af stað keðjuverkun með ófyrirséðum afleiðingum. Umsvifalaust hafi verið gripið til aðgerða þegar ljóst varð að umbeðin aðstoð frá Seðlabankanum fengist ekki, segir Kjartan í yfirlýsingu sem send var fjölmiðlum.

Yfirlýsing Kjartans er birt hér að neðan.