Endurgreiddu 2,5 milljarða til skilvísra viðskiptavina

Arion Banki endurgreiddi í gær samtals 2,5 milljarða króna til skilvísra viðskiptavina bankans. Landbankinn réðst í svipaðar aðgerðir í október en aðrar lánastofnanir hafa ekki tekið ákvörðun um að gera slíkt hið sama.

Um 33 þúsund viðskiptavinir Arion Banka fengu endurgreiðslu í gær en bankinn lítur á aðgerðina sem þakklætisvott til einstaklinga sem greitt hafa skilmerkilega af lánum sínum á síðasta ári. Landbankinn hefur einnig gripið til svipaðra aðgerða.

Arion Banki hefur hins vegar fengið nokkrar fyrirspurnir síðan á fimmtudag frá viðskiptavinum SPRON en Arion banki tók yfir innlán SPRON í maí 2009, útlánin svo sem húsnæðislán runnu hins vegar til slitastjórnar SPRON eða Dróma sem gerði gerði síðan þjónustusamning við Arion Banka þannig að allar greiðslur á lánum Dróma fara í gegnum Arion banka en eru ekki í raun á efnahagsreikningi Arion.

Samkvæmt upplýsingum frá Dróma hafa þeir ekki áætlað að endurgreiða sínum viðskiptavinum á sama hátt og Arion Banki enda ekki með heimild til þess frá kröfuhöfum.

Hjá Íslandsbanka fengust þær upplýsingar að aðgerðir til að koma til móts við viðskiptavini séu alltaf í skoðun en bankinn sé hins vegar núna að einbeita sér að sameiningu við Byr.

Íbúðalánasjóður sem fer með um 60 prósent íbúðalána hér á landi segir að búið sé að reikna út hvað samskonar endurgreiðsla myndi kosta en engar ákvarðanir hafa verið teknar um aðgerðir en það er á forræði Velferðarráðuneytisins að taka slíka ákvörðun.