Sekt á Símann lækkuð um 20 milljónir

Héraðsdómur Reykjavíkur staðfesti í morgun að Síminn skuli greiða sekt vegna brota sem voru framin þegar Síminn keypti Íslenska sjónvarpsfélagið, móðurfélag Skjás eins, árið 2004.

Við kaupin gekkst Síminn undir bann við samtvinnun á þjónustu Símans og Íslenska sjónvarpsfélagsins. Samkvæmt úrskurði Héraðsdóms Reykjavíkur braut fyrirtækið gegn þessu banni með því að veita samhliða aðgang að internetinu í gegnum ADSL-tengingar og aðgang að sjónvarpsefni frá Íslenska sjónvarpsfélaginu gegn einu heildargjaldi. Telur Héraðsdómur Reykjavíkur að stefnandi hafi mátt gera sér grein fyrir að þessi háttsemi hans stangaðist á við umrætt skilyrði sem sett hafði verið samruna félaganna.

Úrskurðarnefnd samkeppnismála hafði komist að þeirri niðurstöðu að Síminn skyldi greiða 50 milljónir króna í sekt, en Héraðsdómur Reykjavíkur lækkaði sektina í 30 milljónir. Ástæðan er sú að héraðsdómur telur brotin ekki vera eins umfangsmikil og úrskurðarnefndin taldi.