Skuldabréfaútgáfa Íslands sú önnur besta að mati Euroweek

Skuldabréfaútgáfa ríkissjóðs Íslands í júní á síðasta ári, upp á einn milljarða dollara, var önnur best heppnaða skuldabréfaútgáfa þjóðríkis á síðasta ári að mati fagtímaritsins Euroweek. Útgáfan var í tíunda sæti þegar horft var til allra skuldabréfaútgáfa.

Vextirnir á útgáfunni voru 4,875 prósent, og þótti hún hafa heppnast vel á erfiðum tímum á lánamörkuðum. Það eru fjárfestar og markaðsaðilar sem velja best heppnuðu útgáfurnar fyrir Euroweek.

Í fyrsta sæti í flokki þjóðríkja var útgáfa Englandsbanka og í þriðja sæti var útgáfa finnska ríkisins.

Í vali á bestu útgáfum í öllum flokkum varð útgáfa Björgunarsjóðs evrusvæðisins (EFSF) í efsta sæti en á listanum yfir 10 bestu útgáfurnar eru m.a. útgáfur Evrópusambandsins, Alþjóðabankans og Bretlands.