Hætta dreifingu á stelpu- og strákaís

Dreifingu á stelpu og strákaísum frá Emmessís hefur verið hætt vegna harðra viðbragða neytenda. Kvörtunum hefur ringt inn til framleiðandans sem íhugar nú alvarlega að stöðva framleiðslu vörunnar til frambúðar.

Tvær ístegundir komu á markað í síðustu viku en önnur tegundin er einungis fyrir stráka og hin er einungis fyrir stelpur. Samskiptasíður á netinu loga nú vegna markaðssetningunnar og hefur framleiðandinn, Emmessís, verið sakað um að ýta undir staðalmyndir kynjanna.

„Við ræddum þetta mikið og fólki fannst þetta fyrst og fremst vera góður húmor og kannski var verið að benda á hvað það er búið að kyngreina allt," segir Leifur Grímsson, markaðsstjóri hjá Emmessís.

Leifur segir starfsfólk Emmessís ekki hafa búist við þeim hörðu viðbrögðum sem markaðssetningin hefur vakið þar sem nokkrar vörur á markaði hafi verið markaðssettar á svipaðan hátt. Tölvupóstum frá reiðum neytendum rignir nú inn til fyrirtækisins.