World Class opnar tíundu líkamsræktarstöðina

World Class opnar nýja líkamsræktarstöð í Egilshöll í Grafarvogi næstkomandi mánudag. Um verður að ræða tíundu líkamsræktarstöðina sem World Class rekur á höfuðborgarsvæðinu, en sú stærsta er í Laugardal eins og flestir vita.

World Class var stofnað árið 1985 af Birni Kr. Leifssyni og fjölskyldu hans. Skömmu eftir bankahrun komst Þrek ehf., eignarhaldsfélagið að baki World Class, í mikinn rekstrarvanda og fór á endanum í þrot. World Class var þá fært inn í annað eignarhaldsfélag sem heitir Laugar ehf. og er í eigu Björns Leifssonar og Hafdísar Jónsdóttur eiginkonu hans, eins og Þrek ehf.

Töluverð málaferli hafa staðið yfir fyrir dómstólum vegna reksturs World Class að undanförnu og eftir því sem Vísir kemst næst er þeim ekki lokið.