Nokkur munur á loðnuverði til sjómanna hér og í Noregi

Nokkur munur er á því verði sem íslenskir sjómenn fá fyrir loðnuna og norskir. Þannig er opinbert verð á kílói á loðnu til manneldis, það er frystingar, um 38 krónur í Noregi. Hér heima er verðið rétt fyrir innan 30 krónur.

Friðrik Arngrímsson framkvæmdastjóri LÍÚ segir að verðið geti sveiflast aðeins eftir því sem líður á vertíðina. Þannig hafi verð á loðnu til bræðslu verið 27 krónur á kílóið fyrir áramótin en er 25 krónur í dag þar sem fitumagnið í loðnunni hefur minnkað. Lítill munur á verði til bræðslu og frystingar skýrist af því að hátt verð fæst nú fyrir mjöl og lýsi.

Norsk loðnuskip hafa landað afla sínum hérlendis í nokkrum mæli þrátt fyrir verðmismuninn. Þetta skýrist af kostnaði við langa siglingu til Noregs og því að íslenskar vinnslustöðvar hafa fært sig nær norska verðinu til að ná viðskiptunum við norsku skipin.