Sérstakur tók skýrslu af Gertner í Lundúnum vegna rannsóknar

Rannsókn sérstaks saksóknara á lánveitingum Kaupþings til hinna auðugu Gertner bræðra í Bretlandi vegna gruns um markaðsmisnotkun er komin á fullan skrið. Moises Gertner, annar bræðranna, er búinn að gefa skýrslu í málinu en það var gert í Lundúnum.

Bræðurnir Moises og Mendi Gertner, sem eru umsvifamiklir í fasteignaviðskiptum í Bretlandi, voru í viðskiptum við Kaupþing fyrir hrun.

Í júní árið 2008 fékk Crosslet Vale Ltd., félag í eigu Gertner bræðra, 14,9 milljarða króna lán hjá Kaupþingi til kaupa á hlutabréfum í bankanum sjálfum og voru bréfin keypt af deild eigin viðskipta Kaupþings. Lánið var tryggt með sjálfskuldarábyrgð bræðranna, auk veðs í hlutabréfum í námufyrirtæki í Kongó og landi í Tékklandi.

Engin hlutabréf voru seld. Við fall bankanna átti Crosslet Vale því enn öll bréfin.

Þessi viðskipti, sem kom fram í skýrslu rannsóknarnefndar Alþingis, eru nú til rannsóknar hjá sérstökum saksóknara vegna gruns um markaðsmisnotkun. Rannsóknin beinist að fyrrverandi stjórnendum Kaupþins, en ekki bræðrunum sem eru vitni í málinu.

Sérstakur saksóknari á í samstarfi við efnahagsbrotadeild bresku lögreglunnar í Bretlandi og getur tekið skýrslur af mönnum þar ef svo ber undir. Fréttastofa náði tali af lögmanni Moises Gertner í dag.

„Hann hitti sérstakan saksóknara í London á skrifstofu efnahagsbrotadeildar bresku lögreglunnar í London. Þar gaf hann sérstökum saksóknara skýrslu," segir Jack Rabinowicz, lögmaður Moises Gertner í samtali við fréttastofu.

Kaup Gertner bræðra á hlutabréfunum voru alfarið fjármögnuð af Kaupþingi, en Rabinowicz segir að skjólstæðingur hans sé ekki til rannsóknar. „Embætti sérstaks saksóknara hefur sagt honum að hann sé ekki til rannsóknar," segir Rabinowicz.

Ólafur Þór Hauksson, sérstakur saksóknari, sagði í samtali við fréttastofu að rannsóknin væri vel á veg komin en vildi ekki tjá sig um málið að öðru leyti.