Búnir greiða 43 prósent af forgangskröfum vegna Icesave

Eignir gamla Landsbankans eru nú metnar á tæplega 1.450 milljarða króna, 122 milljörðum króna meira en forgangskröfur vegna Icesave. Þá hefur bankinn greitt sem nemur fjörutíu og þremur prósentum af forgangskröfum vegna Icesave að því er fram kemur á heimasíðu þrotabús Landsbankans.

Slitastjórn Landsbankans hélt kröfuhafafund í morgun.

Kröfuhöfum voru kynntar upplýsingar um áætlað virði eignasafns bankans í lok fyrsta ársfjórðungs. Þar kom fram að umtalsverður árangur hafi náðst í endurheimtum og nam raunaukning á áætluðu verðmæti eigna milli ársfjórðunga tæplega 77 milljörðum króna.