Íbúðalánasjóður hefur selt 390 íbúðir frá hruni

Af þeim 2380 íbúðum sem Íbúðalánasjóður hefur leyst til sín frá bankahruni hafa 390 verið seldar. Þar af eru 96 á höfuðborgarsvæðinu. Um 1990 íbúðir eru enn í eigu sjóðsins. Í 800 íbúðum búa einstaklingar eða fjölskyldur sem samið hafa við sjóðinn um áframhaldandi búsetu í leiguformi. Um 270 íbúðir eru enn á byggingarstigi og 830 íbúðir standa tómar af ýmsum ástæðum. Í tilkynningu frá Íbúðalánasjóði segir að markmiðið sé að selja þessar eignir.

Íbúðir í eigu sjóðsins verða ekki seldar á undirverði eða látnar fara í stóru magni, heldur verða þær seldar jafnt og þétt á næstu árum á markaðsvirði til að varðveita verðmæti eignasafnsins og raska ekki fasteignamarkaði. Á hverju ári þarf sjóðurinn að greiða hátt í þrjú hundruð þúsund í gjöld, tryggingar og orkukostnað að meðaltali af hverri tómri íbúð í eigu sjóðsins. Þá er ekki talin fjármögnun, viðhald, afskriftir og eignaumsjón.

Íbúðalánasjóður vinnur nú að því að skrá um 230 tómar íbúðir til sölu á fasteignamarkaði og að setja um 80 íbúðir til viðbótar í útleigu. Útleiga íbúða er bæði til að hafa tekjur á móti kostnaði og til að draga úr því ójafnvægi á fasteignamarkaði sem 830 tómar íbúðir valda.