Rekstur borgarinnar betri en áætlanir gerðu ráð fyrir

Rekstur A hluta Reykjavíkurborgar gekk betur en áætlanir gerðu ráð fyrir á fyrsta ársfjórðungi ársins. Þetta kemur fram í tilkynningu til Kauphallarinnar.

Í fjárhagsáætlun var gert ráð fyrir því að rekstrarniðurstaða fyrir fjármagnsliði yrði neikvæð um 861 milljónir kr. á tímabilinu en samkvæmt fyrirliggjandi árshlutauppgjöri er niðurstaðan neikvæð um 405 milljónir kr. sem er 456 milljónum kr. betri niðurstaða en áætlað var.

Rekstrarniðurstaða tímabilsins í heild reyndist neikvæð um 1.081 milljónir kr. en í fjárhagsáætlun var gert ráð fyrir 1.117 milljóna kr. halla. Þannig var rekstrarniðurstaðan 36 milljónum kr. betri en gert var ráð fyrir í fjárhagsáætlun.