Lagaleg umgjörð endurskoðunar óljós

Lagaleg staða endurskoðunar er um margt óljós þar sem alþjóðlegir endurskoðunarstaðlar hafa ekki verið innleiddir í íslensk lög. ,,Þetta er óheppilegt, svo vægt sé til orða tekið," sagði Óttar Pálsson hæstaréttarlögmaður á fundi um ábyrgð endurskoðenda á föstudag.

Óttar Pálsson hæstaréttarlögmaður var einn þeirra sem flutti erindi á morgunverðarfundi Price Waterhouse Coopers í morgun, og sagði m.a. að það væri vægast sagt óheppilegt, að alþjóðlegir endurskoðunarstaðlar hefðu ekki verið leiddir inn í íslensk lög. Með þessu skapaðist óvissa um lagalega umgjörð endurskoðunarstarfsins. Hann sagði ennfremur ábyrgð endurskoðenda á áliti þeirra á ársreikningum vera ótvíræða, og nefndi í því samhengi innlend og erlend dómafordæmi.

Vignir Rafn Gíslason, endurskoðandi hjá Price Waterhouse Coopers, sem endurskoðaði meðal annars ársreikninga Landsbankans fyrir hrun bankans, fjallaði m.a. um stöðu mála hér á landi árið 2007, eins og hún birtist í ársreikningum. Slitastjórnir Landsbankans og Glitnis hafa stefnt Price Waterhouse vegna vinnu við endurskoðun ársreikninga, og eru þau mál nú til meðferðar í dómskerfinu.

Vignir Rafn sagði að eigið fé íslenskra fjármálafyrirtækja árið 2007 hefði verið um þúsund milljarðar króna, og eigið fé íslenskra fyrirtækja ríflega 7.000 þúsund milljarðar. Staðan var því góð á pappírunum, og nefndi Vignir Rafn meðal annars að af tíu stærstu skuldurum hjá Glitni og Landsbankanum, hefðu ársreikningar endurskoðenda verið áritaðir án fyrirvara hjá öllum nema einum.

Vignir Rafn nefndi meðal annars að endurskoðunaraðferðir hefðu mikil áhrif á eiginfjárstöðu, og tók sem dæmi að eigið fé fjárfestingafélagsins Exista, sem átti um fjórðungshlut í Kaupþingi fyrir hrun, hefði verið um hundrað milljörðum minna ef eignir félagsins hefðu verið færðar á markaðsverði í ársreikningi en ekki samkvæmt hlutdeildaraðferð. Hann sagði þetta m.a. sýna að endurskoðunin fæli ekki í sér mat sem væri fullkomlega áreiðanlegt, heldur væri matið háð þeirri aðferðarfræði og upplýsingum sem fyrir lægi í hvert skipti.