Ríkið hyggst selja hluti í Landsbankanum á þessu ári

Íslenska ríkið hyggst selja hlut í Landsbankanum á þessu ári og því næsta, þangað til eignarhlutur ríkisins er kominn niður í tvo þriðju hluta af heildarhlutafé, en eignarhluturinn í dag er tæplega 82 prósent. Þetta kemur fram í viðtali Reuters fréttastofunnar við Jóhönnu Sigurðardóttur forsætisráðherra. „Markmiðið er að hefja sölu á hlutum í Landsbankanum á þessu ári og selja litla hluti í einu, þangað til við erum komin niður í tvo þriðju af hlutafé," segir Jóhanna. Þá segir Jóhanna að vilji sé til þess hjá ríkisstjórninni að ríkið muni eiga tvo þriðju í bankanum til frambúðar.

Þá segir Jóhanna að ríkið sé opið fyrir því að selja aðra eignarhluti sína í bönkum, þ.e. meðal annars 13 prósent hlut í Arion banka og um fimm prósent hlut í Íslandsbanka, ef gott verð býðst.

Viðtalið við Jóhönnu, þar sem hún ræðir m.a. um stöðu efnahagsmála hér á landi í samanburði við önnur lönd, má sjá hér.