Tekjur minkabænda gætu losað 1,5 milljarða

Áætlað er að tekjur íslenskra minkabænda í ár af uppboðunum hjá Kopenhagen Fur í Kaupmannahöfn gætu losað um 1,5 milljarða kr. í ár.

Hér er átt við sölutímabilið hjá Kopenhagen Fur sem stendur frá desember og fram til september á hverju ári. Júní uppboðið er framundan en það hefur yfirleitt verið stærsta uppboðið fyrir íslensk minkaskinn á hverju ári.

Björn Halldórsson formaður Sambands íslenskra loðdýrabænda segir að sennilega verði hátt í 50.000 íslensk minkaskinn seld í næstu viku. Hann segir að það sem af er tímabilinu hafi um 78.000 íslensk skinn verið seld og hefur meðalverð þeirra verið 511 danskar krónur, eða rúmlega 11 þúsund kr.

Fari svo að verðið haldist, eins og allt bendir til, segir Björn að tekjur loðdýrabænda í ár gætu losað um 1,5 milljarða kr. Þetta sé álíka upphæð og 1/6 hluti af gjaldeyristekjunum vegna aukningar þorskkvótans á næsta ári.

Björn segir að vegna hins góða árangurs minkabænda undanfarin ár séu umsvifin í greininni að aukast. Hafinn sé rekstur í nýju minkabúi og þrjú í viðbót séu í farvatninu. Þá hafi eitt bú verið stækkað töluvert. Á milli 80 og 100 manns hafa nú lifibrauð af minkarækt á Íslandi.