Þessir eiga peningana á Íslandi – Einstaklingar með 545,3 milljarða

Innstæður hjá stærstu íslensku viðskiptabönkunum, Arion banka, Íslandsbanka og Landsbankanum, námu í lok janúar á þessu ári 1.678 milljörðum króna, eða sem nemur svipaðri upphæð og einni árlegri landsframleiðslu Íslands. Það er einnig svipuð upphæð og nemur heildarskuldum ríkissjóðs.

Í fjármálastöðugleikariti Seðlabanka Íslands, sem kom í síðustu viku, kemur fram hvernig þessi innlán skiptast á milli eigenda eftir flokkum.

Stærstur hluti peningana sem eru á reikningum í bönkunum er í eigu í íslenskra einstaklinga, eða ríflega 500,5 milljarðar króna, en að auki eiga þeir 25,6 milljarða í erlendum gjaldeyri. Næst þar á eftir koma íslenskir lögaðilar, aðrir en fjármálafyrirtæki, lífeyris- eða verðbréfasjóðir, með 460 milljarða, og að auki 124 milljarða í erlendum gjaldeyri. Samtals eiga íslenskir og erlendir einstaklingar 545,3 milljarða króna inn á reikningum.

Heildarinnlán lífeyris- og verðbréfasjóða eru 193,6 milljarðar króna, og 9 milljarðar að auki í erlendum gjaldeyri. Það gera ríflega 202 milljarðar króna í heild.

Fjármálafyrirtæki í slitameðferð áttu 146,7 milljarða inn á reikningum, 72,7 milljarða í krónum og 74 í erlendum gjaldeyri.

Innstæður hjá stóru viðskiptabönkunum þremur:

Erlend fjármálafyrirtæki 102 milljarðar (96,7 ma. króna, 5,7 ma. í erlendum gjaldeyri).

Innlend fjármálafyrirtæki 85,5 milljarðar (75,4 ma. króna, 10 milljarðar í erlendum gjaldeyri)

Íslensk fjármálafyrirtæki í slitameðferð 146,7 milljarðar (72,7 ma. í íslenskum krónum, 74 ma. í erlendum gjaldeyri)

Íslenskir lífeyris- og verðbréfasjóðir 202 milljarðar (193,6 ma. í íslenskum krónum, 9 ma. í erlendum gjaldeyri)

Aðrir erlendir lögaðilar 12,4 milljarðar (8,3 ma. í íslenskum krónum, 4 ma. í erlendum gjaldeyri)

Aðrir íslenskir aðilar 582,7 milljarðar (458,3 ma. í íslenskum krónum, 124,4 í erlendum gjaldeyri)

Erlendir einstaklingar 19,3 milljarðar (17 ma. í íslenskum krónum, 2,3 ma. í erlendum gjaldeyri)

Íslenskir einstaklingar 526,2 milljarðar (500,6 ma. í íslenskum krónum, 25,6 í erlendum gjaldeyrir)

Innistæður samtals: 1.678 milljarðar (1.422,8 ma. í íslenskum krónum, og 255,3 í erlendum gjaldeyri)