Mikið í húfi hjá Birgi á lokadeginum á Ítalíu

Birgir Leifur Hafþórsson náði sér vel á strik í gær á þriðja og næst síðasta keppnisdegi á úrtökumótinu fyrir Evrópumótaröðina í golfi. Birgir lék á 69 höggum eða þremur höggum undir pari vallar og er hann í 21. -26. sæti fyrir lokahringinn sem fram fer í dag. Mótið er hluti af 1. stigi úrtökumótsins og má gera ráð fyrir að 27 kylfingar komist áfram af þessu móti sem fram fer á Ítalíu. Birgir er samtals á tveimur höggum undir pari vallar (71-74-69). Birgir fékk sex fugla (-1) á hringnum í gær en þrjá skolla (+1). Fuglarnir komu á 2., 6., 9., 10., 15., og 18. braut. Birgir fór upp um 21 sæti eftir hringinn í gær og lagaði þar með stöðu sína talsvert fyrir lokahringinn. Robin Wingard frá Englandi er efstur á þessu móti á -14. Til þess að öðlast keppnisrétt á Evrópumótaröðinni í golfi þurfa kylfingarnir að komast í gegnum þrjú úrtökumót. Í næstu viku hefja þeir Ólafur Björn Loftsson og Ólafur Már Sigurðsson keppni á fyrsta stigi úrtökumótsins en keppnisvöllurinn er á Englandi. Þórður Már Gissurarson og Stefán Már Stefánsson náðu ekki að komast í gegnum 1. stigið á móti sem fram fór nýverið í Þýskalandi.