Birkir fékk tækifærið hjá nýja þjálfaranum

Birkir Bjarnason var í byrjunarliði Pescara og spilaði allan leikinn þegar liðið tapaði 0-1 á heimabelli á móti Roma í ítölsku A-deildinni í dag.

Þetta var fyrsti leikur Pescara-liðsins undir stjórn Cristiano Bergodi sem tók við liðinu á dögunum af Giovanni Stroppa sem hafði ekki notað Birki í fjórum leikjum í röð.

Mattia Destro skoraði eina mark leiksins strax á fimmtu mínútu leiksins og tapið þýðir að Pescara situr í neðsta sæti deildarinnar.

Þetta er í fyrsta sinn síðan í 2. umferð 1. september þar sem Birkir klárar allar 90 mínúturnar.