KA-menn sömdu við markakóng 2. deildarinnar

Níu leikmenn skrifuðu í dag undir samning við 1. deildarlið KA í fótboltanum en félagið ætlar sér stóra hluti í 1. deildinni næsta sumar undir stjórn Bjarna Jóhannssonar, fyrrum þjálfara Stjörnunnar.

Gunnar Már Magnússon og Bessi Víðisson eru nýir leikmenn hjá félaginu en þeir koma báðir frá Dalvík. Bessi skoraði 18 mörk í 19 leikjum í 2. deildinni síðasta sumar og varð markakóngur deildarinnar. Fannar Freyr Gíslason kemur frá Tindastól en endaði síðasta tímabil hjá KA.

Fréttatilkynningin frá KA:

Níu leikmenn skrifa undir samninga við KA

Í dag var skrifað undir samninga knattspyrnudeildar KA við níu leikmenn. Þar af framlengdu þrír leikmenn samninga sína, einn leikmaður hefur áður verið á lánssamningi hjá KA en fimm leikmenn voru nú að semja í fyrsta skipti við félagið.

Leikmennirnir sem skrifuðu undir samninga í dag eru Aksentije Milisic, Baldvin Ingimar Baldvinsson, Bessi Víðisson, Bjarni Mark Antonsson, Fannar Freyr Gíslason, Gunnar Már Magnússon, Ívar Guðlaugur Ívarsson, Jón Heiðar Magnússon og Ólafur Aron Pétursson.

Aksentije Milisic, miðjumaður, f. 1993, er uppalinn KA-maður. Hann hefur verið samningsbundinn KA síðan í maí 2011 og hefur komið við sögu í einum meistaraflokksleik. Nýr samningur er til tveggja ára.

Baldvin Ingimar Baldvinsson, miðvörður, f. 1996. Baldvin Ingimar er Siglfirðingur og skipti í KA í nóvember sl. Hann á fjóra landsleiki með U-17 landsliði Íslands á árinu 2012. Samningurinn er til þriggja ára.

Bessi Víðisson, miðju-/sóknarmaður, f. 1990. Bessi kemur frá Dalvík, þar sem hann hefur síðustu tvö ár spilað með Dalvík/Reyni í 2. deildinni. Áður hafði hann spilað með Keflavík, Fjarðabyggð og þar áður Dalvík/Reyni, en þar átti hann sína fyrstu meistaraflokksleiki árið 2006. Síðastliðið sumar spilaði Bessi 22 leiki í deild og bikar og skoraði í þeim 21 mark, sem tryggði honum markakóngstitilinn í 2. deildinni sumarið 2012. Í það heila hefur Bessi spilað 93 meistaraflokksleiki í deild og bikar og skorað í þeim 32 mörk. Samningurinn er til tveggja ára.

Bjarni Mark Antonsson, miðjumaður, f. 1995. Bjarni Mark er Siglfirðingur og skipti í KA í desember 2011. Hann spilaði sl. sumar með 2. flokki KA. Samningurinn er til þriggja ára.

Fannar Freyr Gíslason, sóknarmaður, f. 1991. Fannar Freyr er Sauðkrækingur, en hefur síðustu tvö ár verið samningsbundinn ÍA. Hann hefur frá árinu 2006 spilað 71 meistaraflokksleik með Tindastóli, ÍA, HK og KA og skorað í þeim 10 mörk. Síðastliðið sumar kom hann í félagaskiptaglugganum á lánssamningi til KA og spilaði níu leiki síðari hluta sumars. Nýr samningur er til tveggja ára.

Gunnar Már Magnússon, miðjumaður, f. 1987. Gunnar Már kemur frá Dalvík. Á árunum 2003, 2004 og 2005 spilaði hann undir merkjum Leifturs/Dalvíkur í 1. og 2. deild, en frá 2006 hefur Gunnar Már spilað með Dalvík/Reyni í 2. og 3. deild. Hann á að baki 135 meistaraflokksleiki í deild og bikar og hefur skorað í þeim 49 mörk. Samningurinn er til tveggja ára.

Ívar Guðlaugur Ívarsson, kantmaður, f. 1991, er uppalinn KA-maður. Hann hefur verið samningsbundinn KA síðan í desember 2010. Hann hefur spilað 21 meistaraflokksleik fyrir KA og Magna á Grenivík, en þar spilaði hann á lánssamningi sumarið 2011 og aftur 2012. Nýr samningur er til tveggja ára.

Jón Heiðar Magnússon, bakvörður, f. 1991, er uppalinn KA-maður. Hann hefur verið samningsbundinn KA síðan í desember 2010. Hann hefur spilað 30 meistaraflokksleiki með félaginu. Nýr samningur er til tveggja ára.

Ólafur Aron Pétursson, miðjumaður, f. 1995. Ólafur Aron Pétursson er uppalinn KA-maður. Hann spilaði sl. sumar með 2. flokki KA. Samningurinn er til þriggja ára.