Erfitt að kveðja Tom

Áhugaverðustu skiptin í NFL-deildinni síðan leikmannamarkaðurinn opnaði eru klárlega vistaskipti utherjans Wes Welker frá New England til Denver. Þar skildi hann við Tom Brady til þess að spila með Peyton Manning.

"Erfiðast við skiptin var að segja bless við Tom. Hann er gríðarlegur keppnismaður, frábær leikmaður og góður vinur. Ég óska honum alls hins besta," sagði Welker er hann var kynntur til leiks hjá Denver.

Útherjinn skrifaði undir tveggja ára samning sem færir honum 12 milljónir dollara í vasann. Patriots bauð honum "aðeins" 10 milljónir dollara fyrir sama tímabil.

"Ég er mjög spenntur fyrir þessu tækifæri. Það verður gaman að spila með Peyton og hjálpa þessu félagi að vinna."