Leiknissigur fyrir norðan | Sveinbjörn sá um Völsung

Kristján Páll Jónsson skoraði eina mark leiksins í 1-0 sigri Leiknis á KA norðan heiða í 1. deild karla í dag. Þróttur vann 3-0 sigur á Völsungi.

Ekkert nema 2. deildar fótbolti bíður Húsvíkinga sem töpuðu enn einum leiknum í Laugardalnum í dag. Sveinbjörn Jónasson kom Þrótti yfir um miðjan fyrri hálfleikinn og bætti við öðru marki snemma í þeim síðari. Andri Björn Sigurðsson gulltryggði sigurinn á 55. mínútu.

Þróttur komst upp úr fallsæti og í það tíunda með sigrinum. Völsungur er á botninum með tvö stig á botninum og útlitið svart.

Eftir jafntefli gegn KF í síðustu umferð tapaði KA 1-0 heima gegn Leikni. Eftir markalausan fyrri hálfleik skoraði kantmaðurinn Kristján Páll Jónsson sigurmarkið á 70. mínútu. Leiknir er í fjórða sæti með 25 stig en KA í 7. sæti með 22 stig.

Upplýsingar um markaskorar frá Úrslit.net.