Bregðast við þvagláti við Þorrasali

Forsvarsmenn Golfklúbbs Kópavogs og Garðabæjar vonast til þess tilfellum fækki þar sem kylfingar „taki út á sér sprellann" á 13. braut vallarins.

Íbúi í Þorrasölum í Kópavogi sendi klúbbnum bréf í vikunni. Þar sagði hann að ekki væri hægt að hafast við úti á svölum á blokk sinni.

„Mig langar að koma þeim tilmælum til skila að þið biðjið golfiðkendur vinsamlega að hætta að kasta af sér þvagi beint fyrir framan blokkirnar í Þorrasölum. Hér er ekki hægt að vera út á svölum án þess að einhver karlinn taki ekki út á sér "sprellann" og kasti af sér þvagi,“ eins og segir í bréfinu.

Agnar Már Jónsson, framkvæmdastjóri GKG, segir í samtali við Kylfing.is að áform klúbbsins séu að bæta salernisaðstöðu á umræddu svæði.

„„Við erum með flotta salernisaðstöðu við 12. teig. Það er jafnframt stefna okkar að setja upp kamar við flöt á 14. braut, sem nýtist þá þeim sem spila Mýrina líka (5. flöt). Þangað til vonumst við til að karlkynskylfingar finni önnur úrræði en þau að hrella granna okkar í Þorrasölum, enda er okkur í mun að viðhalda nágrannakærleikanum,“ segir Agnar.