Hulda bætti Íslandsmetið um metahelgi

Hulda Sigurjónsdóttir, Suðra, setti nýtt Íslandsmet í kúluvarpi um helgina í flokki þroskahamlaðra. Hulda sem tók þátt í aðventumóti Ármanns varpaði kúlunni 9,20 metra en gamla innanhússmetið hennar var 8,88 metrar.

 

Aðventumót Ármanns markar upphaf innanhússtímabils frjálsíþróttamanna þennan veturinn. Hulda opnar því tímabilið með miklum látum en hún hefur í haust æft mjög markvisst undir stjórn Ástu Katrínar Helgadóttur.

Met Huldu var eitt fjögurra Íslandsmeta sem féllu um helgina. Þá fór unglingamót Fjölnis í sundi fram í 25 metra laug þar sem þrjú metanna féllu.

Thelma Björg Björnsdóttir, ÍFR, nýkjörin íþróttakona ársins fyllti fjóra tugina af Íslandsmetum þetta árið er hún setti tvö ný þetta mótið. Thelma sem keppir í flokki hreyfihamlaðra (S6) synti á 3:48,44 mínútum í 200 metra fjórsundi og svo setti hún nýtt Íslandsmet í 50m flugsundi á tímanum 51,26 sek.

Marinó Ingi Adolfsson, ÍFR, setti einnig nýtt Íslandsmet í 200m fjórsundi er hann synti á tímanum 3;11,88 mín.