Fimmta jafntefli Roma í sex leikjum - forskot Juve fimm stig

AC Milan og Roma gerðu 2-2 jafntefli í ítölsku úrvalsdeildinni í kvöld sem þýðir að Roma mistókst að minnka forskot Juventus á toppnum í þrjú stig. Mario Balotello lagði upp jöfnunarmark Sulley Muntari þrettán mínútum fyrir leikslok.

Roma hefur ekki tapað leik í deildinni en þetta var hinsvegar fimmta jafntefli liðsins í síðustu sex leikjum. Liðið er með 38 stig (11 sigrar, 5 jafntefli) en Juventus (14 sigrar, 1 jafntefli, 1 tap) er í góðum málum á toppnum með 43 stig.

Mattia Destro og  Kevin Strootman komu Roma yfir í upphafi hvors hálfleiks en AC Milan jafnaði í bæði skiptin, fyrst Cristián Zapata eftir hálftíma leik og svo Sulley Muntari í lok leiksins.

AC Milan er í 11. sæti deildarinnar, 24 stigum á eftir toppliði Juventus og sextán stigum á eftir Napoli sem er í 3. sætinu.