Ragnar Kjartansson tilnefndur til Artes Mundi verðlaunanna

Ragnar Kjartansson er tilnefndur til myndlistaverðlaunanna Artes Mundi í Bretlandi en þau eru ein virtustu á Bretlandseyjum.

Verðlaunin eru aðeins afhent á tveggja ára fresti en tíu listamenn eru tilnefndir.

Verðlaunin eru sérstaklega ætluð þeim listamönnum sem hafa ekki vakið heimsathygli á sínu sviði. Vefur BBC greinir frá þessu í morgun.

Verðlaunin verða afhent í janúar árið 2015 og fær sigurvegarinn 40 þúsund pund eða tæplega átta milljónir í verðlaunafé.

Verk listamanna verða til sýnis í Cardiff, Wales í sautján vikur en alls bárust 800 tilnefningar frá 70 löndum.

Í augnablikinu er Ragnar með verk sitt The Visitor til sýnis  í gallerí Kling og Bang en hann var í ítarlegu viðtali við Fréttablaðið í lok nóvember.

Ragnar seldi á dögunum öll eintökin af The Visitor á rúmlega 80 milljónir íslenskra króna.

Hér að neðan má sjá hvaða listamenn eru tilnefndir:

CARLOS BUNGA (Portúgal)

OMER FAST (Ísrael)

THEASTER GATES (Bandaríkin)

SANJA IVEKOVIC (Króatía)

RAGNAR KJARTANSSON (Ísland)

SHARON LOCKHART (Bandaríkin)

RENATA LUCAS (Brasilía)

RENZO MARTENS (Holland)

KAREN MIRZA and BRAD BUTLER (Bretland)