Bílar fastir um allt Suðurland

Björgunarsveitarmenn af öllu Suðurlandi voru fram yfir miðnætti að aðstoða fólk í föstum bílum um allt Suðurlandið og varð að skilja þó nokkra bíla eftir, sem sóttir verða í dag.

Hellisheiði og þrengslum var lokað síðdegis í gær vegna ófærðar, en Vegagerðarmenn opnuðu þrengslin aftur klukkan hálf ellefu í gærkvöldi og Hellisheiðin var opnuð klukkan hálf eitt. Þá hafði heldur dregið úr veðurofsanum. 

Áfram er þó búist við austan hvassviðri eða stormi víða um land þar til seint í dag og áfram verður stormur með suðurströndinni fram eftir degi á morgun, en víðasthvar er nokkurra stiga hiti á landinu þannig að úrkoman verður rigning eða slydda.