Pútín róar hlébarðaunga

„Ég kann vel að meta dýr, svo virðist sem ég hafi tilfinningu fyrir þeim,“ segir Vladimír Pútín Rússlandsforseti, sem í dag sást strjúka hlébarðaunga á upptökum rússneska ríkissjónvarpsins.

Myndirnar náðust þegar Pútín sýndi háttsettum fulltrúum Ólympíunefndarinnar um þjóðgarðinn í Sotsjí, þar sem meðal annars er að finna hæli fyrir persneska hlébarða. Var meiningin að sýna fram á að komandi Vetrarólympíuleikar muni hafa jákvæð áhrif á umhverfið í nágrenni við borgina.

Samkvæmt rússneska fréttamiðlinum RIA Novosti hafði hlébarðaunginn Grom (sem merkir þruma) þegar ráðist á tvo fréttamenn sem hættu sér inn í búr hans og sært þá. Pútín hafi þó tekist að róa hið sex mánaða gamla kattardýr og ekki hlotið áverka af. Samkvæmt frásögn RIA Novosti á Pútín einnig að hafa lofað hlébarða fyrir kyngetu sína eftir að gestir fengu að heyra að dýrin geti eðlað sig oftar en 200 sinnum á viku.

Þetta er ekki í fyrsta sinn sem rússneska ríkissjónvarpið ýtir undir útivistarímynd Pútíns með þessum hætti, en hann hefur líka verið sýndur bjarga sjónvarpsliði frá tígrisdýri svo eitthvað sé nefnt.