„Mjög mikill fjöldi sem við vorum að taka á móti“

Fjöldahjálparmiðstöðvar voru opnaðar beggja vegna lokunarpóstanna við Holtavörðuheiði í gær og beindi lögreglan því til fólks að allir skyldu halda sig heima vegna veðursins. Fjöldahjálparstöðvarnar voru annarsvegar í Íþróttamiðstöðinni á Blönduósi og hins vegar í Reykjaskóla í Hrútafirði.

„Það var mjög mikið af fólki og það voru opnaðar tvær fjöldahjálparstöðvar. Það voru um rúmlega 150 manns á Blönduósi og um 70 í Reykjaskóla í Hrútafirði. Þetta var mjög mikill fjöldi sem við vorum að taka á móti. Við fengum mikla aðstoð og það var góð samvinna,“ segir Aðalheiður og að íbúar hafi til dæmis lánað bedda og teppi fyrir fólk að sofa með.

Hún segir allt kapp hafa verið lagt á að koma öllum í hús og fólk fari að vakna núna. Þá komi í ljós hvenær þau komist áfram ferðar sinnar. Flestir sem gistu í Blönduósi hafi komist sjálfir þangað á sínum bílum en einhverjir þeirra sem leituðu skjóls í Hrútafirði hafi mögulega fest bíla sína eða þurft að skilja þá eftir og þau verði þá aðstoðuð í dag.