Oddvitaáskorunin - Vilja bæta mannleg gildi á Akranesi

Vísir stendur fyrir Oddvitaáskoruninni 2014 þar sem skorað er á oddvita allra flokka í kjördæmum um land allt að taka þátt.

Þröstur Þór Ólafsson leiðir lista Vinstri grænna og óháðra á Akranesi í sveitarstjórnarkosningunum í vor.

Ég htiti Þröstur Þór Ólafsson, 48.ára giftur Eydísi Líndal Finnbogadóttur og eigum við 3 syni.

Ég er vélfræðingur og vélvirkjameistari ásamt kennararéttindum í framhaldsskóla frá Kennaraháskólanum.

Ég kenni vélvirkjun í Fjölbrautaskóla vesturlands á Akranesi og hef gert það frá því ég kom á Akranes.

Ég syng í Kór Akraneskirkju, hef áhuga á ferðalögum innanlends og sérstaklega um hálendið, ég er með svart belti í karate en hef látið pólítíkina hafa þann tíma sem var ætlaður í æfingar. Ég hef átt mjög stuttan feril í fótbolta sem hægri bakvörður og taldi að það bæri að stoppa manninn ef ég næði ekki boltanum. Þetta olli smá misskilningi á vellinum og ákvað ég því að snúa mér að sporti sem hentaði því betur, Var í handbolta í nokkur ár með Skallagrím og keppti m.a. gegn Akranesi. Langar ekki að muna hvernig þeir leikar fóru.

Mér fannst handbolti vera full ofbeldisfull íþrótt og fór því í karate hjá Þórshamri í Reykjavík 1994 og hef stundað það fram að því að ég fór í bæjarstjórn 2010. Síðan hefur Akrafjallið ásamt hjólastígum bæjarins verið mín líkamsrækt.

YFIRHEYRSLAN

Hver er fallegasti staðurinn á Íslandi?

Grímsvötn.

Hundar eða kettir?

Gullfiskar.

Hver er stærsta stundin í lífinu?

Þegar ég gifti mig og fæðing sona minna.

Hver er uppáhaldsmaturinn þinn?

Soðin ýsa með nýjum kartöflum, rúgbrauði og hömsum.

Hvernig bíl ekur þú?

Nissan

Besta minningin?

Þegar ég man hvar ég setti lyklana.

Hefur þú verið tekinn af lögreglunni?

Fyrir of hægan akstur og svo rétt á eftir fyrir of hraðan akstur.

Hverju sérðu mest eftir?

Öllu því sem ég hef ekki gert.

Draumaferðalagið?

Hvert sem er, einn með konunni minni.

Hefur þú migið í saltan sjó?

Já og fékk ekkert sérstakt út úr því.

Hvað er það skrýtnasta sem þú hefur gert?

Synda í Dauðahafinu.

Hefur þú viðurkennt mistök?

Oft.

Hverju ertu stoltastur af?

Að hafa gert það mikið að ég þarf að viðurkenna mistök.

Fram að sveitarstjórnarkosningunum 31. maí munum við birta kynningu á oddvitum víðsvegar um landið. Allir oddvitar geta tekið þátt í Oddvitaáskorun Vísis. Nánari upplýsingar er hægt að nálgast á netfanginu samuel@365.is.