Aron: Leystum þetta lengst af vel

"Við lentum aðeins undir í byrjun fyrri hálfleiks, en komum til baka og vorum yfir í hálfleik. Við vorum með góða stjórn á leiknum," sagði landsliðsþjálfarinn Aron Kristjánsson í samtali við Vísi eftir eins marks tap Íslands, 33-32, fyrir Bosníu í Sarajevó í kvöld.

"Við náðum góðu fjögurra marka forskoti í seinni hálfleik, en svo fórum við að tapa of mörgum boltum og fengum alltaf hraðaupphlaupsmörk í bakið. Það er dýrt að gera svona mörg mistök í jafn mikilvægum leik sem þessum.

"Við vissum að ef við næðum ekki að ljúka sóknunum okkar nægjanlega vel, þá myndu þeir refsa með hraðaupphlaupum sem og þeir gerðu. Þeir gerðu þetta vel og komu miklum þrýstingi á okkur og við megum vinna varnarvinnuna betur í seinni leiknum," sagði Aron, en allar aðstæður voru Bosníumönnum í hag í leiknum í kvöld.

"Við vissum fyrirfram að þetta yrði erfiður leikur og við að fengjum ekki neitt hjá dómurunum, en mér fannst við leysa þetta lengst af vel. Svo náðu þeir þessu áhlaupi í seinni hálfleik sem var okkur dýrt.

"Þeir voru komnir 2-3 mörkum yfir í lokin og miðað við stemmninguna hjá þeim hefði sá munur getað aukist, en við sýndum góðan leik síðustu mínúturnar og náðum að minnka muninn í eitt mark fyrir leikslok.

"Við skorum 32 mörk á útivelli, en við þurfum að verjast hraðaupphlaupunum þeirra betur og við megum bæta varnarleikinn. Við eigum að vera betri en þetta, að ná að loka leiknum þegar við erum komnir fjórum mörkum yfir" sagði Aron, en það er allt opið fyrir seinni leikinn  sem fer fram í Laugardalshöll 15. júní næstkomandi.

"Þetta var bara fyrri hálfleikur, við erum búnir að fara á erfiðan útivöll þar sem aðstæðurnar voru þeim í hag. Við eigum eftir að mæta þeim í Höllinni og við vonumst til að áhorfendur fjölmenni á leikinn og hjálpi okkur áfram.

"Við þurfum að vinna upp eitt mark og nú þurfum við bara að undirbúa okkur vel fyrir seinni leikinn og klára hann," sagði Aron að endingu.