„Þú ert að biðja mig um að finna eitt stig“

Staðan var jöfn í hálfleik, 17-17, en erfiðar upphafsmínútur í síðari hálfleik reyndust vera vendipunktur leiksins.

„Við byrjum seinni hálfleikinn í undirtölu og erum aular. Þeir taka hraðaupphlaup og mark yfir völlinn og svo förum við aftur í undirtölu mjög fljótlega, erum þá einum færri í fjórar mínútur. Mér fannst það gefa þeim þetta andrými til þess að ná að klára leikinn. Í grunninn var það þessi munur.“

ÍR hefði þurft að fá stig í leiknum til þess að halda sér í Olís-deildinni þar sem Stjarnan tapaði gegn Fram á sama tíma. Gekk það þó ekki upp. Hvernig gerir Bjarni upp þetta sveiflukennda tímabil hjá sínu liði sem þrátt fyrir fall komst í úrslitaleik Powerade bikarsins fyrir tveimur vikum.

Slæm byrjun á tímabilinu reyndist of dýr

„Við náttúrulega byrjum tímabilið frekar illa og það skrifast á mig. Það voru bara nokkrir hlutir í byrjun sem að voru ekki alveg að virka sem við vorum að gera og við missum menn í meiðsli og þá kemur smá svona spírall af því við fengum þarna Selfoss og Þór og fengum helvítis rothögg á móti Þór. Það tók svolítinn tíma að vinda ofan af því, svo tókst það og við erum búnir að vera helvíti góðir eftir áramót.“

Aðspurður um einhvern vendipunkt á tímabilinu þá segir Bjarni aðeins hafa munað stigi að liðið næði að halda sér uppi.

„Svo er þetta náttúrulega það að þú ert að biðja mig um að finna eitt stig, ég get fundið það svona í átta leikjum. Stundum er lífið bara stöngin út. Burt séð frá þessu öllu þá er ég ekkert eðlilega stoltur af liðinu mínu. Við förum í bikarúrslit og erum mögulega yngsta lið sögunnar í bikarúrslitum. Við erum að spila á uppöldum strákum og það eru mjög margir búnir að rísa í vetur.“

„Við erum alveg búnir að ná því sem við viljum gera, það vantaði bara upp á herslumuninn. Fyrir mig þá er ég ósáttur við sjálfan mig hvernig við byrjuðum tímabilið, en sjúklega ánægður með strákana. Á engum tímapunkti í allan vetur var ekkert annað en bara áfram og geggjaður gangur í þessu hjá þeim,“ segir Bjarni.

Framhaldið hjá Bjarna Fritzsyni

Bjarni er í 8. sæti á lista Sjálfstæðisflokksins í Reykjavík fyrir komandi kosningar og segir það vera næst á dagskrá hjá sér. Auk þess vill hann halda áfram að efla handboltann hjá ÍR.

„Ég ætla bara að reyna að gera Reykjavík að betri borg, bara byrja á því og sjá hvort það sé ekki hægt að gera aðeins betur þar. Ég er bara ÍR-ingur og ætla bara að halda áfram að vinna að því að hjálpa ÍR að vera frábært handboltafélag. Við erum með einhverja tíu stráka í yngri landsliðunum og erum bara búnir að standa okkur frábærlega í að byggja upp handboltann hjá ÍR og ég verð bara áfram í því.“

Eins og sannur stjórnmálamaður talaði Bjarni í kringum framhaldið hjá sér, hvort hann yrði þjálfari meistaraflokks karla hjá ÍR áfram. Því beindist lokaspurningin beint að því efni, hvort hann myndi mæta til leiks næsta haust sem þjálfari ÍR.

„Ég bara veit það ekki alveg. Ég hugsa að við setjumst bara niður eftir tímabilið og finnum bara hvað við viljum gera. Eina sem ég veit er að við munum spýta í og gera meira og gera betur, vera faglegri og við erum með mjög unga aðra stráka á leiðinni upp. Við munum bara stíga á bensíngjöfina og líta á þetta sem eina hraðahindrun að draumnum okkar.“