Ginobili spilaði með sprungu í beini í lokaúrslitunum

Manu Ginobili var í stóru hlutverki þegar San Antonio Spurs tryggði sér NBA-meistaratitilinn á dögunum en Argentínumaðurinn varð þá NBA-meistari í fjórða sinn á ferlinum.

Nú er komið í ljós að Ginobili spilaði meiddur í lokaúrslitunum en hann er með sprungu í beinni í hægri fæti. Meiðslin þýða að Ginobili getur væntanlega ekki verið með argentínska landsliðinu á HM á Spáni í haust.

Manu Ginobili skoraði 14,4 stig og gaf 4,4 stoðsendingar að meðaltali í leik í lokaúrslitunum en hann hitti úr 42 prósent þriggja stiga skota sinna í einvíginu.

Það er ekki vitað hvenær Ginobili meiddist en hann er hörkutól sem hefur oft spilað meiddur á sínum ferli. Ginobili sjálfur er ekki búinn að afskrifa það að vera með á HM en ætlar að sjá til hvernig honum líður eftir þrjár vikur.