Ármann Höskuldsson eldfjallafræðingur, sem staddur er við gosstöðvarnar í Holuhrauni þar sem ný gossprunga hefur opnast, náði mynd af þeim í morgun. Jarðvísindastofnun Háskóla Íslands birtir myndina á Facebook-síðu sinni í dag.
Ármann staðfesti í samtali við fréttastofu í morgun að nýja sprungan hefði opnast sunnan við gossprunguna þaðan sem 12 ferkílómetrar hrauns hafa flætt undanfarna daga. Sprungan teygir sig í áttina að Dyngjujökli en ljóst er að gjósi undir jökli fylgir því mikil hætta á flóði.
Lögreglustjórinn á Húsavík hefur ákveðið í ljósi þessara upplýsinga að loka fyrir alla frekari umferð inn á svæðið norðan Vatnajökuls. Fjölmiðlar og vísindamenn hafa til þessa haft takmarkaðan aðgang að svæðinu að uppfylltum ákveðnum skilyrðum.
Á meðan þessi óvissa varir er ekki talið rétt að hleypa fleirum inn á svæðið. Jafnframt hefur verið sett upp innri lokun á vegi 910 við Vaðöldu. Þessi ákvörðun verður endurskoðuð um leið og nýjar upplýsingar berast.
Á þessari stundu er ekki vitað hvort viðbúnaðarstigi verður breytt en ef gosið fer undir jökul er fastlega ráð fyrir því gert að um hlaup verði að ræða.
Mynd af nýju sprungunni í Holuhrauni
Tengdar fréttir
Nýjar gossprungur myndast
Gosið færist nú nær jökli, nýjar gossprungur eru að myndast miðja vegu milli gömlu sprungunnar og jökuls.
Hundrað skjálftar í nótt
Stærsti skjálftinn var í Bárðarbungu og nam hann 5,2 stigum.
