Ólafur: Verðum að læra af þessu

FC Nordsjælland, lið Ólafs Kristjánssonar, var slegið úr leik af D-deildarliðinu Egedal í dönsku bikarkeppninni í gær.

Egedal hafði betur í vítaspyrnukeppni eftir 1-1 jafntefli í framlengdum leik. Ólafur sagði að úrslitin væru mikil vonbrigði í viðtali sem birtist á heimasíðu Nordsjælland í gær.

„Við vorum ekki nógu beittir í dag. Við komum okkur í stöðu til að vinna leikinn en vorum ekki nógu góðir. Þeir refsuðu okkur fyrir mistök og þetta endaði svo í vítaspyrnukeppni þar sem niðurstaðan er oft tilviljunarkennd,“ sagði Ólafur.

„Ég tel að það sé bara eitt að gera í þessari stöðu og það er að læra af leiknum. Þetta eru mikil vonbrigði nú, eins og vera ber, en við verðum sterkari fyrir vikið.“