Kærasta Harjit ökklabrotnaði við klifur yfir grindverk

Kærasta Harjit Delay, stuðningsmanns FH sem slasaðist á Þórsvelli um miðjan september er hann féll úr stúkunni, varð fyrir því óláni að ökklabrotna eftir dramatíska 2-1 tapið gegn Stjörnunni sem fram fór á laugardag. Harjit fór inn á völlinn eftir leikinn og ætlaði kærastan að fylgja honum. Ekki tókst þó betur til en svo að hún braut á sér ökklann.

Um hreint ótrúlega óheppni er að ræða en innan við mánuður er síðan Harjit slapp með skrekkinn við fall úr stúkunni fyrir viðureign FH og Þórs norðan heiða. Harjit rotaðist, brákaði höfuðkúpu sína og augnbotninn. Hann braut einnig þrjár tennur og mynduðust bólgur í heila hans.

Harjit sagði í viðtali í kvöldfréttum Stöðvar 2 viku síðar telja sig heppinn að vera ekki í hjólastól og hafa ekki hálsbrotnað. Hann lenti með andlitið á steypukanti og ljóst að mun verr hefði getað farið. Hann gagnrýndi mjög aðstöðuna á Þórsvelli í kjölfar fallsins og sagðist ætla að leita réttar síns.

Úttekt Fréttablaðsins og Vísis á stúkum félaga í Pepsi-deildinni leiddi í ljós að handriðið í stúkunni á Þórsvelli var það hæsta en handriðið í Kaplakrika hið lægsta og uppfyllti ekki öryggiskröfur samkvæmt byggingareglugerð. Um er að ræða handriðin í suðurstúkunni en slysið á laugardaginn varð í norðurstúkunni þar sem ekki er um söðu fallhættu að ræða.

Erlendur Árni Hjálmarsson, forstöðumaður Fasteignafélags Hafnarfjarðar, sagði í skriflegu svari til Fréttablaðsins á dögunum að enn væri verið að vinna við lokafrágang suðurstúkunnar á Kaplakrikavelli, þar með talið atriði er varði öryggis og aðgengismál.

„Umrætt handrið er eitt af því sem verður fullgert nú í vetur,“ sagði hann í byrjun mánaðarins.