Hvessir á Vestfjörðum með kvöldinu

Vindstrengur er skammt úti fyrir Vestfjörðum og eru horfur á að hann komi inn á land seint í kvöld og þá hvessir með snjókomu og takmörkuðu skyggni. Þetta kemur fram í tilkynningu frá Vegagerðinni. Vindur gæti víða farið upp í 15 til 20 metrar á sekúndu.

Allhvass vindur einnig við Breiðafjörð í nótt sem og á Snæfellsnesi og Suðurnesjum. Þar skafrenningur og blint með köflum í nótt og fyrramálið.

Hálka og snjóþekja er á flestum vegum á Suðurlandi og á Reykjanesi og víða snjókoma eða él en ekki hvasst. Suðurstrandarvegur er þungfær.

Snjóþekja eða hálka er einnig á flestum vegum á Vesturlandi en þungfært er um Heydal og Skógarströnd en ófært í Álftafirði.

Á Vestfjörðum er snjóþekja eða hálka og víða éljagangur. Verið er að hreinsa norður í Árneshrepp á Ströndum.

Snjóþekja eða hálka er á Norðurlandi. Flughált er milli Sauðárkróks og Ketiláss, í Út-Blönduhlíð og Hjaltadal. Á Austur- og Suðausturlandi er hálka víðast hvar.