Norðmenn án stærstu stjörnu sinnar á HM í fótbolta

Norska kvennalandsliðið í fótbolta verður án lykilleikmanns í úrslitakeppni HM í Kanada sem hefst í næsta mánuði því Caroline Graham Hansen er meidd.

Landsliðsþjálfarinn Truls Straume-Næsheim var búin að velja Caroline Graham Hansen í HM-hópinn en eftir skoðun hjá læknaliðinu í gær kom í ljós að hún gæti ekki verið með.

Caroline Graham Hansen sló í gegn á Em 2013 þegar norska liðið fór alla leið í úrslitaleikinn en þá var hún aðeins átján ára gömul. Hansen lék áður með Stabæk en spilar nú með þýska stórliðinu Wolfsburg.

Caroline Graham Hansen skoraði 8 mörk og gaf 8 stoðsendingar í 9 leikjum í undankeppni HM þar sem norsku stelpurnar unnu sinn riðil. Hansen fór til Wolfsburg í haust en hefur lítið getað spilað vegna hnémeiðslanna.

„Það hefur verið draumur hjá mér að spila á HM en ég sé það núna að ég get ekki spilað með þessa verki," sagði Caroline Graham Hansen í viðtali á heimasíðu norska sambandsins.

„Ég er vissulega svekkt en ég veit að ég á mín bestu fótboltaár eftir. Ég vona því að ég eigi eftir að fá tækifæri til að spila á fleiri stórmótum. Ég mun fylgjast með stelpunum á sjónvarpsskjánum," sagði Hansen.

Anja Sönstevold kemur inn í norska hópinn fyrir Hansen en Sönstevold er liðsfélagi landsliðsmarkvarðarins Guðbjargar Gunnarsdóttur hjá Lilleström.

Norðmenn eru í riðli með Þýskalandi, Fílabeinsströndinni og Tælandi og fyrsti leikurinn er á móti Tælandi í Ottawa 7. júní næstkomandi.