Nordsjælland mistókst að tryggja sér fimmta sætið

Lokaumferðin í dönsku úrvalsdeildinni fór fram í dag þar sem fjölmargir íslenskir leikmenn voru í eldlínunni. Þrír Íslendingar voru í sigurliði.

Guðmundur Þórarinsson og Adam Örn Arnarson spiluðu allan leikinn í 1-0 tapi Nordsjælland gegn AaB. Guðjón Baldvinsson kom inná sem varamaður þegar sjö mínútur voru eftir.

Með tapinu mistókst Nordsjælland að tryggja sér fimmta sætið í deildinni, en þeir enda í sjötta sætinu á fyrsta tímabili Ólafs Kristjánssonar með liðið.

Rúrik Gíslason spilaði líklega sinn síðasta leik fyrir FCK þegar liðið vann 1-0 sigur á Hobro í dag. FCK hafði fyrir leikinn tryggt sér annað sæti deildarinnar.

Rúrik spilaði fyrstu 70 mínúturnar, en hann er á leið til Nurnberg samkvæmt heimildum danska og þýska vefmiðla í dag. Björn Bergmann Sigurðarson spilaði allan leikinn, en hann er einnig að yfirgefa liðið. Hann var á láni frá Wolves.

Baldur Sigurðsson var í eldlínunni með SönderjyskE sem tapaði 2-1 gegn Midtjylland á útivelli. Baldur spilaði allan leikinn, en SönderjyskE endar í tíunda sæti; fjórum stigum frá fallsæti.

Ari Freyr Skúlason og Hallgrímur Jónasson voru í byrjunarliði OB sem tapaði 0-2 gegn Randers á útivelli. Ari Freyr fór af velli mínútu fyrir hlé, en OB endar í níunda sætinu.

Theodór Elmar Bjarnason var ekki í leikmannahóp Randers og Ögmundur Kristinsson sat allan tímann á varamannabekknum, en Randers endar í fjórða sæti deildarinnar. Ögmundur yfirgefur nú Randers og heldur til Svíþjóðar þar sem hann leikur með Hammarby á næstu leiktíð.

Eggert Gunnþór Jónsson nældi sér í gult spjald í 3-1 sigri Vestsjælland á Silkeborg. Bæði þessi lið falla niður um deild, en óvíst er hvort Eggert Gunnþór leiti á ný mið.

Úrslitin úr öllum leikjum dagsins:

AaB - FC Nordsjælland 1-0

Bröndby IF - Esbjerg 0-1

FCK - Hobro 1-0

Midtjylland - SönderjyskE 2-1

FC Vestsjælland - Silkeborg 3-1

OB - Randers 0-2