CCP veitti Rauða krossinum 13,8 milljónir vegna Nepal

Starfsfólk CCP veitti fulltrúum Rauða kross Íslands 13,8 milljónir króna, 103.650 þúsund dalir, til mannúðar- og hjálparstarfs í Nepal. Athöfnin fór fram við skrifstofur CCP en spilarar EVE Online söfnuðu upphæðinni og fór söfnunin fram í leiknum sjálfum.

Viðstaddur afhendinguna var Forseti Íslands, sem hrósaði spilurum leiksins og starfsfólki CCP fyrir þann samhug sem íbúum Nepal væri sýndur með söfnuninni. Hann talaði einnig um að hér væri á ferð gott dæmi um hvernig hugvit og ný tækni getur nýst til góðra verka og hvernig þetta framtak gæti verið væri öðrum leikjafyrirtækjum heimsins til eftirbreytni. Söfnun sem þessi bryti niður andamæri og hindranir og að það væri svo sannarlega virðingavert að sjá og upplifa hvernig samfélag spilara EVE Online allstaðar að úr heiminum kæmi saman með þessum hætti til að leggja fórnarlömbum jarðskjálftana í Nepal lið.

Í tilkynningu frá CCP og Rauða krossinum segir að þetta sé stærsta einstaka framlagið í söfnun Rauða kross Íslands fyrir íbúa í Nepal. Þar á eftir koma íslensk stjórnvöld sem veittu tíu milljónir króna í mannúðaraðstoð til Alþjóðasambands landsfélaga Rauða krossins og Rauða hálfmánans vegna jarðskjálftanna.

„Það er átakanlegt að þurfa að horfa upp á innviði samfélags, sem var einkar viðkvæmt fyrir, vera slegna niður af náttúruöflunum með jafn afgerandi hætti og í Nepal,“ segir Hermann Ottósson, framkvæmdastjóri Rauða krossins á Íslandi. „Alþjóðahreyfing Rauða krossins gaf út neyðarkall til allra landsfélaga í kjölfar risaskjálftans 25. apríl og hafa síðan sjálfboðaliðar og sendifulltrúar unnið dag og nótt að hjálparstarfi við einkar erfiðar aðstæður í torfæru landi. Samgönguæðar hafa rofnað og fjarskiptasamband er stopult.“

„Fyrsta og síðasta skylda Rauða krossins er að hlúa að slösuðum og öllum þeim sem eru berskjaldaðir í kjölfar skjálftans. Sjá fólki fyrir húsaskjóli, heilbrigðisþjónustu, hreinu vatni og hreinlætisvörum til að koma í veg fyrir útbreiðslu sjúkdóma. Verkefnin í Nepal eru krefjandi og verða viðfangsefni alþjóðasamfélagsins næstu ár og áratugi. En í öllu þessu myrkri er sem betur fer ljóstýra. Heimurinn hefur ekki gleymt Nepal og það er einmitt með aðstoð almennings sem er aflögufært sem tryggir og flýtir fyrir endurhæfingu heils samfélags. Þakklætið fyrir viðleitni CCP og samfélags EVE Online er ólýsanlegt. Rauði krossinn á Íslandi er stoltur að eiga slíka bakhjarla sem CCP. Slíkt samstarf er ómetanlegt í neyðarástandi á borð við það sem ríkir nú í Nepal.“

Eldar Ástþórsson, upplýsingafulltrúi CCP, segir að starfsmenn hafi fylgst með eyðileggingunni og hörmungunum sem dunið hafa yfir Nepal í kjölfar jarðskjálftana, og bæði þeir og spilarar EVE Online hafi viljað reyna gera eitthvað til að hjálpa.

„Við erum auðvitað afskaplega ánægð með að geta tekið þátt í að styðja við gríðarlega mikilvægt hjálparstarf Rauða krossins á svæðinu og geta búið til þennan vettvang fyrir spilara EVE Online til að láta gott af sér leiða. En við erum fyrst og fremst stolt af spilurum leiksins fyrir að rétta íbúum Nepal hjálparhönd með þessum hætti.

Þótt starfsfólk okkar taki virkan þátt í söfnuninni, erum við hjá CCP í raun aðeins skapa umgörðina sem gerir spilurum EVE Online kleift að leggja þessu brýna málefni lið. Þeir hafa nú gefið hátt í 14 milljónir króna til hjálparstafsins sem er ótrúlega flottur árangur og glæsilegt í alla staði. Hér sannast það sem oft er sagt um þann samhug sem ríkir meðal spilara EVE Online, þó það ríki vissulega mikil samkeppni í leiknum sjálfum og þar séu háð stríð og orustur, þá er samvinna og samstarf eitt af lykilatriðum leiksins - sem og í því samfélagi sem í kringum hann þrífst.“

Einstaklingar geta lagt söfnun Rauða krossins lið lið með því að hringja í 904-1500 (framlag: 1.500 kr), 904-2500 (framlag 2.500 kr) eða 904-5500 (framlag 5.500 kr). Þá er einnig hægt að leggja fé inn á reikning Rauða krossins 0342-26-12, kt. 530269-2649.