Fjórða tap Framara

Fram er enn í basli í 1. deild karla og tapaði í kvöld sínum fjórða leik á tímabilinu. Liðið fór í heimasókn á Selfoss og tapaði fyrir heimamönnum, 2-1.

Ingþór Björgvinsson og Luka Jagicic komu Selfyssingum í 2-0 forystu en Magnús Már Lúðvíksson klóraði í bakkann fyrir gestina úr Reykjavík á lokamínútum leiksins.

Fram er í níunda sæti deildarinnar með fjögur stig að loknum sex leikjum. Þetta var fjórða tap liðsins í deildinni í sumar en liðið féll þar að auki úr leik í 32-liða úrslitum bikarkeppninnar eftir tap gegn KV.

Pétur Pétursson var ráðinn þjálfari Fram um miðjan síðasta mánuð.