Hollenskt úrvalsdeildarlið búið að bjóða í Hannes

Hannes Þór Halldórsson, landsliðsmarkvörður í fótbolta, gæti spilað í hollensku úrvalsdeildinni á næstu leiktíð.

Hannes staðfesti við Akraborgina á X977 í dag að norska B-deildarliðinu Sandnes Ulf, sem hann leikur með, hefði borist tilboð frá félagi úr hollensku úrvalsdeildinni.

„Nú eru tvö tilboð inn á borði hjá félaginu. Það er annars vegar frá tyrkneska félaginu sem nefnt hefur verið og svo annað sem kom nýlega. Það er frá Hollandi,“ sagði Hannes Þór í Akraborginni.

„Þetta er virkilega spennandi fyrir mig. Ég er búinn að fara þarna út og kíkja á þetta allt saman. Nú vonast ég bara til þess að það komi lending í þetta mál á allra næstu dögum,“ sagði markvörðurinn.

Þó tilboðin séu inn á borði hjá norska félaginu er óvíst hvort það láti landsliðsmarkvörðinn fara fyrir það fé sem boðið er.

„Tilboð hljómar vel, en það er spurning hvort þetta sé eitthvað sem menn sætta sig við hérna. Ég hef samt gert mönnum það algjörlega ljóst hvað ég vil gera þannig nú sest ég niður með mínum mönnum og skoða framhaldið,“ sagði Hannes Þór Halldórsson.

Hann vann tvo Íslandsmeistaratitla með KR áður en hann fór til Sandnes í úrvalsdeildina í fyrra. Liðið féll í B-deildina en Hannes hélt áfram hjá félaginu. Hannes er búinn að spila alla leiki liðsins í B-deildinni í sumar eða þrettán talsins og fá á sig aðeins 15 mörk.

Hannes Þór hefur spilað frábærlega fyrir íslenska landsliðið í undankeppni EM 2016, en hann er aðeins búinn að fá á sig þrjú mörk í sex leikjum.