Viking fékk skell

Viking mistókst að koma sér nær toppsætunum tveimur í norsku úrvalsdeildinni í knattspyrnu í dag, en liðið tapaði á útivelli gegn Strømsgodset.

Viking fékk óskabyrjun því Suleiman Abdullahi kom þeim yfir eftir fjögurra mínútna leik. Adam var ekki lengi í paradís því eftir stundarfjórðung var staðan orðin 2-1, Strømsgodset í vil.

Marvin Ogunjimi jafnaði á tíundu mínútu og fimm mínútum síðar mætti Marvin við öðru marki sínu og staðan 2-1 eftir stundarfjórðung. Fjörug byrjun.

Bismarck Adjei-Boateng, leikmaður Strømsgodset, lét reka sig útaf undir lok fyrri hálfleiks, en staðan Strømsgodset var 2-1 yfir í hálfleik.

Eftir stundarfjórðung í síðari hálfleik var staðan orðin 3-1 fyrir Strømsgodset, en Gustav Wikheim skoraði þá þriðja mark heimamanna.

Heimamenn voru ekki hættir því einum færri bættu þeir við fjórða markinu, en það gerði Lars-Christopher Vilsvik tólf mínútum fyrir leikslok. Ekki urðu mörkin fleiri og lokatölur 4-1 sigur heimamanna.

Með sigri hefði Viking verið í þriðja sætinu, einungis tveimur stigum frá Stabæk í öðru sætinu, en þess í stað eru þeir í fjórða sæti með 25 stig, fimm stigum frá öðru sætinu. Strømsgodset er í því sjötta.

Indriði Sigurðsson og Jón Daði Böðvarsson spiluðu allan leikinn fyrir Viking, en Steinþór Freyr Þorsteinsson kom inná sem varamaður á 71. mínútu.