Sjálfsmark felldi Viking

Þrír Íslendingar voru í byrjunarliði Viking sem laut í gras fyrir Haugesund á heimavelli í norsku úrvalsdeildinni í kvöld. Eina mark leiksins var sjálfsmark Karol Mets, leikmanns Viking, á 69. mínútu.

Indriði Sigurðsson, Steinþór Freyr Þorsteinsson og Jón Daði Böðvarsson voru allir í byrjunarliði Viking sem er í 4. sæti deildarinnar með 31 stig, átta stigum á eftir toppliði Rosenborg.

Viking var meira með boltann í leiknum í kvöld og átti 23 skot gegn aðeins sex hjá Haugesund en það dugði ekki til. Litlu munaði þó á köflum en boltinn small þrívegis í trévirkinu hjá Haugesund.

Indriði fór af velli í hálfleik og Steinþóri var kippt út af eftir rúman klukkutíma. Jón Daði lék allan leikinn fyrir Viking en hann er sem kunnugt er á leið til þýska liðsins Kaiserslautern.